SK Nanga Machan Temegah Bulih Champian Anugerah Kokurikulum
KANOWIT: Sekula Primari (SK) Nanga
Machan ditu udah mujur teulih pemutus sereta pemujur dalam aktivti kokurikulum
ti diatur Opis Menteri Pelajar ungkup renggat pelilih mit di bagi menua Sibu.
Kepala Pengajar Johnson Sendal
madahka, sekeda pemujur pemutus nya ngasuh sekula temegah endar ati iya nya
champian dalam Pekit Anugerah Kokurikulum Renggat Nengeri Sarawak.
“Rambau Karnival Anugerah Sekolah
Asrama Terbilang (ASAT) renggat Pelilih Mit Kanowit mega SK Nanga Machan udah
mujur nyadi champian kategori ASAT Sekula Primari Renggat Pelilih Mit Kanowit.
“Kelimpah ari nya, kami udah mujur
teulihka pemujur dalam Pekit Inovasi diatur Opis Pelajar Pelilih (PPD) Kanowit
nyadi champion keseluruhan; menang ba ketetiga kategori ke dipekitka,” ku iya
rambau bejaku maya bejadika Kem Penyulut Ujian Penilaian Sekolah Rendah (UPSR)
2015 diungkupka ngagai Nembiak Primari 6 begulai enggau apai indai nembiak SK
Nanga Machan ditu kemari.
Bisi 44 iku nembiak primari 6
sekula nya udah nyereta kem pengelama lima hari nya ke diatar Gerempung Nembiak
Dayak Sarawak (PEBEDAS) begulai enggau SK Nanga Machan.
Bela bisi datai iya nya Chairman
PEBEDAS Sibu Mathrew Moilan, Sekretari PEBEDAS Sibu Dallas Robert, Chairman
Serakup Apai Indai enggau Pengajar (PIBG) SK Nanga Machan Kunying Mandoh sereta
Penolong Kanan Kurikulum SK Nanga Machan Maureen James.
Johnson ngarapka nengah atur
program nya, penyampau pemutus UPSR SK Nanga Machan ke pas ila deka nambah
sereta Gred Purata Sekula (GPS) deka nurun ari 2.40 ngagai 2.0 taun tu.
Iya mega chukup beterima kasih
ngagai kerejasama sereta komitmen ti udah dibantaika semua staf sekula nya ke
udah bebendar ngelama tu dalam bejalaika pengawa nyapai mayuh pemujur.
“Piak PIBG mega ngembuan tanggungpengawa
ke manah amat dalam pengawa mantu piak sekula dalam sebarang aktiviti ti diatur
di sekula.
“Enti nadai kerejasama enggau
komitmen ke tinggi sekula enda ulih nyapai pemujur enggau mujur,” ku iya.
Sentara nya, Maureen madahka,
batang pengawa program nya deka ngemanahka pemutus nembiak dalam UPSR ari 74.4
peratus ngagai 81.8 peratus.
Juluk UPSR SK Nanga Machan ungkup
taun 2015 tu iya nya 81.8 peratus, ku iya.
Kenu ku iya, kem tu mega meri
peluang ngagai raban nembiak nyikap diri tumu agi sebedau sida napi peresa
UPSR.
“Nengah kem tu mega, nembiak diberi
penerang ke tumu chara enggau teknik nyaut tanya UPSR ti manah.
“Tu mega ulih ngelatih nembiak
nyaut tanya UPSR sebedau sida napi peresa UPSR iya ke amat,” ku iya nandu.
Rambau kem nya mega, PEBEDAS mega
meri sereta mantu piak sekula nengah pengawa ngatur seiti Slot Motivasyen Khas
ungkup Nembiak Primari 6 begulai enggau raban apai indai.
Dulu agi ari nya, dalam jaku ke
dipansutka iya, Mathew meri besai terima kasih ngagai piak sekula laban udah
meri kerejasama dalam pengawa mantu nembiak enggau raban komuniti di kandang
menua Machan, kanowit.
Iya mega ngarapka program ke sebaka
ulih terus diatur jemah ila.
Sumber : Borneo Post August
22, 2015, Saturday
 Nanga Machan ditu udah mujur teulih pemu...){kind=link}
Tiada ulasan:
Catat Ulasan